要批評民意調查，人人都有意見，但如果民意調查機構嘅背景、辦事人員嘅資歷、機構嘅組織都有公開資料嘅話，公眾認識多啲，自不然會有一個判斷，認為邊一間民意調查機構／公司比較可靠。
香港大學、中文大學、嶺南大學、浸會大學、理工大學都有民意調查單位，都有（一）接外間委託生意，（二）本身發起嘅民意研究，前者為了財政收入，自負盈虧，不要大學長期補貼，後者係為了學術研究，了解民情，揀一啲合時，適合時勢嘅題目嚟做。鍾庭耀嘅港大民意研究計劃係打開門做生意嘅，李家傑大可搵佢做一個「恒基兆業樓宇業主滿意度」嘅調查，或者「市民買樓意欲調查」之類，以第一身「買家用家」嘅經驗嚟測試鍾庭耀調查是否偏頗嘅。
調查既然有好多種，意見自然大有不同。譬如三月七日「大公報」以大篇幅在第六版報道：69%市民認同普選須遵基本法，由一個叫做「香港研究協會」在2月27日至3月4日訪問1070名市民得到上述數字。查港大民意研究計劃嘅網頁，所有管理人員及研究助理名單齊備，主要人員全部附上學歷、資歷。查香港研究協會網頁呢？網上資料簡單到極，睇完除咗知道佢係一個調查機構外，究竟係誰人組織，附屬那一個學術機構，一概欠奉，而理事會人員有五位，主席蘇祉祺博士、理事有徐子龍先生、翁少華先生、邵漢新博士及覃亮先生，無學歷及資歷介紹，究竟係何方猛人，左丁山一個都唔識，至於工作人員、研究人員，亦無名單，讀者可以自行判斷，將「香港研究協會」與港大民意研究計劃比較之後，你對邊一間嘅調查結果更有信心？李家傑有意抗衡鍾庭耀，叫中華總商會、廣東社團、福建社團等有錢團體夾錢，搵中大科大教授合組一個新民意調查機構，以佢地嘅財力，舉手之勞箒，但中大、科大啲教授如果加入，是否真係可以炮製一啲啱聽嘅民意調查呀？（例如梁振英民望急升至70%），如果呢兩間大學嘅教授咁容易擠走鍾庭耀，有關人士教出嚟嘅學生，你要咯！