德勤又失一大客！越秀買咗創興銀行（1111）之後，成功邀得恒生銀行（011）前一姐梁高美懿出山，出任創銀副主席兼董事總經理，成為創銀一姐。不過呢單刁有人歡喜有人愁，新官上任後，有人冇得撈，講緊嘅唔係邊位創銀高層，而且係創銀用開嘅核數師德勤。
究竟德勤做錯乜嘢得失客仔？非也，其實只係因為創銀嘅新母公司越秀，本身委任羅兵咸做核數師，咁佢哋買咗創銀之後，兩間用埋同一間核數師，都好正常。於是德勤就會喺今年5月8日股東會退任，創銀盤數以後由羅兵咸睇埋。
呢個劇情係咪似曾相識呢？2012年4月長實（001）都係以類似理由唔再用德勤，七十年代開始用德勤嘅長實話，想同和黃（013）用番同一間會計師行，咁樣方便好多，於是就一齊用埋羅兵咸。又係去咗羅兵咸度，真係講都冇咁啱呀。