和平佔中發起人陳健民同幫港出聲召集人周融噚日同場出席一個論壇講普選，一如所料周融又有謬論。
話說擺明車馬反佔中嘅周融，直指佔中係用嚟嚇阿爺，但佢深信阿爺係嚇唔倒㗎喎，然後居然好騎呢咁做比喻，話佔中就好似禽流感肆虐下，買隻雞畀細路仔玩，形容咁樣非常危險，應該要報警，幫港出聲就係「自衞嘅人」。嗱，雖然則此「衞」不同彼「慰」，但依然聽到在場人士O晒嘴。
有與會者問周融，唔佔中嘅話，應該用乜嘢方法爭普選呢？幫港出聲有冇Plan B呢？周融只係一味叫大家要和平、唔好動亂，卒之俾陳健民寸爆莫講Plan B，佢哋連Plan A都冇。
周融見自己道理講唔贏，最終竟然賴論壇似為佔中宣傳，有與會者話周融咁講有辱與會者，最後主持人都忍唔住打圓場，叫周融收口。