萬眾期待嘅意大利名畫《以馬忤斯的晚餐》（1605至1606年）終於嚟到香港喇！八方噚日率先去咗金鐘亞洲協會香港中心，親眼睇真啲呢幅舉世名畫，原來都相當大幅㗎喎，有141×175厘米，令人覺得好似同耶穌面對面咁，見證佢復活後同門徒顯現神聖時刻。
一幅陰暗 另一幅活潑
幅畫本來放喺米蘭布雷拉畫廊，總監Sandrina Bandera博士仲特登護送幅畫嚟香港，噚日同傳媒朋友嚟個正宗解畫。Sandrina話呢幅《以馬忤斯的晚餐》標誌住畫家卡拉瓦喬（Caravaggio）風格上嘅轉捩點，大量嘅黑色同陰影營造咗一種沉鬱、嚴肅嘅氣氛，卡拉瓦喬此後嘅畫作都延續呢種氛圍。光線描繪上都好特別，耶穌塊面好似發光咁，反映作者想得到救贖嘅心境。
原來卡拉瓦喬早於呢幅畫五年前、即1601年時亦畫過一幅同名、同主題嘅畫作，𠵱家由倫敦國家美術館收藏。倫敦嗰幅入面嘅耶穌面龐較飽滿、精神（仲剃咗鬚㖭），枱上食物有雞、水果同飲品，門徒動作較大、比較生動，成個tone都活潑啲。而香港展出嗰幅呢，耶穌神色疲憊消瘦，枱上只有麵包，門徒同其他人啞口無言，若有所思，兩幅畫表現到畫家心態上嘅轉變，對生命中嘅痛苦、脆弱懷不安感。原來卡拉瓦喬喺畫香港展出嗰幅畫時，處於人生嘅黑暗時期，打人打到被放逐要離開羅馬，到1606年仲殺咗人要走難，顛沛流離。
同場加映四位本地藝術家，包括王無邪、蘇慶強、曾建華同周俊輝嘅作品。佢哋嘅作品雖然未必直接受卡拉瓦喬影響，但就喺主題上有地方好match。有興趣嘅話，要先到太古廣場櫃枱索取免費門票，今日起展到4月13日，每日早上11點開到晚上9點㗎。
同場加映
《華南人物誌》 蘇慶強
《澄懷十一》（1987） 王無邪
《水韻之六》（2008） 王無邪
mailto:[email protected]