隔牆有耳:發仔接棒 照蒲貴賓樓 - 李八方

隔牆有耳:
發仔接棒 照蒲貴賓樓 - 李八方

全國政協上年換屆後,鄉議局主席劉皇發退下火線,卸任政協委員,佢個仔劉業強Kenneth就接棒,做咗政協新丁,呢兩年都乖乖跟大隊北上開會。由於發叔做咗政協好耐,年年都喺北京貴賓樓蒲,所以好多貴賓樓服務員都好認得發叔㗎。八方聽Kenneth講,有啲服務員一見到佢,就有種似曾相識嘅感覺;有人仲一眼睇穿,直接問佢係咪劉皇發個仔!Kenneth都話估唔到啲服務員咁眼利。雖然唔再係政協委員,但發叔今次都有北上㗎,除咗係要飛上去出席經民聯嘅晚宴,亦特別送別前基本法起草委員許崇德,以前發叔每年北上,都會搵許老敍舊㗎。