「民企之父」張化橋出名眼光獨到，去到邊間上市公司，嗰隻股嘅股價多數有異動，新近佢擔任創業板公司奧思知（8325）主席。
呢間公司今年1月建議改名做中國支付通，呢排同電商、手遊、支付有些少關係嘅股份都炒到飛起，呢隻股加埋張化橋個名，應該都會好有化學作用。
張化橋離開瑞銀，唔做分析員之後都幾多動向。佢2006年至2008年擔任深控（604）首席運營官，之後返過瑞銀，2011年透過旗下慢牛資本，入股廣州市萬穗小額貸款，做過一段時間主席，期內佢又走去民生國際（938）做CEO，不過半年後就拜拜，消息公佈後民生股價挫逾一成。
睇資料，張化橋2012年已經擔任奧思知非執董，呢次佢轉做主席，加上公司又話改名大搞，應該都會轉趨高調，不過小股民都係睇清楚係乜東東先啦。