喺《蘋果》，Prof J有幾個必讀嘅專欄，一定捧場！（一）曾淵滄教授，理論與實務兼備，有料到；（二）周顯，細價股專家，名牌多到佢自己都唔記得，Prof J都有買佢嘅書兼送畀朋友仔，遲啲喺電視媒體推一推先（好彩已得周生嘅允許，唔係俾佢話Prof J抽佢水，哈）；（三）股榮，佢寫嘢直截了當，起題精采，「不求高深，只求傳真」，字簡意精！學嘢！
近期市場流行一句叫「香港是寵壞了的孩子」，聽到都幾心傷，事實Prof J不論在工作及大學時，都感覺到我哋無咗哥哥嘅金曲，「不信命，只靠雙手去苦拼」嘅感應，真係黯然！
Prof J相信以我今時今日嘅料子，直至我消失喺天與地嗰日我都仲有飯食，但世界巨輪又不斷向前，曾經睇過一本書叫《想法改變命運》，Prof J覺得有正確系統嘅價值思維係非常重要，「一日未死，一鋪可以翻身」，何必抱怨世界，而不改進自己呢，係唔係？
市場上，寵壞咗嘅股票可其多，雙馬股被市場寵壞到不得了！喺中國人社會，越被寵壞越非理性，正所謂市場偏心偏喺你度就算鬼數！見到咁，呢啲寵壞咗嘅股票，自然就越升越恃寵生驕！正如張衛健話頭，「 Yo！使乜驚！」係咪？新經濟、新技術工藝永遠係低調嘅無名英雄，佢哋嘅貢獻，令到社會邁步向前！
繼續追蹤世紀陽光
上星期，同世紀陽光（509）老總午餐，對新技術工藝了解多咗！正所謂「教學相長」，人哋畀資訊你，你又做系統分析，自然事半功倍啦！一間公司，有技術工藝，有專才合作，有好嘅生產有佈局，又有好嘅網點，全年多賺逾七成；呢期潮流興盈喜、績優，隻股唔郁，逆向思維，繼續追蹤，出發！
徐燦傑
中國銀河國際財富管理主管
本欄逢周三刊出