鍾庭耀不為西環所喜，並不是甚麼秘密，從2000年的「港大民調風波」開始，港大校長鄭耀宗及鍾的老師黃紹倫教授離職後，左派建制派對他懷恨至今，今天的維基百科有關鍾庭耀一條，不知誰人所寫，便指鍾庭耀收取美國、英國的美元、英鎊的資助，並指控他的民意調查「難有學術性和獨立性可言，民意調查亦往往偏向幫助反對派和抹黑建制派。」在維基百科講一千次便很可能成為「真理」，令鍾庭耀的聲譽萬劫不復。
但係講還講，真正在「議事堂」上，公然在中國/中共領導人面前指責鍾庭耀在關鍵時刻發表不利特區政府及建制派民意調查結果的，即政協委員李家傑在三月四日的政協會議發言，還是第一次，於是惹起不少中環老友議論紛紛，猜測呢位千億公子究竟所為何事。
照計，要砌鍾庭耀，最正確嘅方法係挑戰港大民意研究計劃嘅調查方法學，由抽樣方法、樣本代表性、問卷設計、統計技術、結果詳釋各方面，提出質疑，檢驗鍾庭耀之調查，是否合乎國際公認之學術標準。抽樣民意調查並非鍾庭耀新創，無非自美國引入，五十年前香港已用之於日用產品之市場調查，左派、梁班子如有人才，與鍾庭耀擺數據、講理論、辯結果，有何不可？可惜吖，有大智慧嘅李嘉誠早已睇穿：有才能嘅人唔出聲，冇才能嘅人爭住做，左派慘情。
李家傑家族曾捐贈巨款俾港大建設百年校園，對港大貢獻至巨，依家在張德江面前痛批鍾庭耀，唔知係唔係要佢醒目地自動與港大劃清界線呢？譬如鍾庭耀放棄「港大」兩個字，自動改名為「鍾庭耀民意研究計劃」，或者冇咁乞人憎啩？其實2012年特首競選時，左丁山跟隨挺唐派，好鬼討厭鍾庭耀㗎，佢往往在關鍵時刻，發表梁振英民望拋離唐英年嘅調查，幫梁振英幫到出面啦！鍾庭耀次次話民陣搞七一大遊行，人數冇咁多，還未破過十萬人，夠令泛民派人士討厭啦，最近又指李卓人嘅工黨知名度偏低，泛民唔知會唔會鬧佢偏頗呢？