梁振英要鞏固個人政治基礎，必須下向基層派錢，上則予梁粉地產商在大嶼山圈地，要成功必先「鬥倒」阻頭阻勢之曾俊華，所以預算案公佈後梁粉紛紛出招，毫不留情砌鬍鬚仔，將內鬥公開化，此乃昔日董陳之爭version 2.0，而結果可能有異。因陳方安生其中一條死罪是有異心，覬覦特首寶座，所以被錢其琛訓斥後退休下台，當時中央對董仍然全力支持。但曾俊華在官場以冇野心見稱，並且同北京財金系統官員認識，而其公共財政思路，亦是一貫港澳辦睇法，梁粉要鼓動風潮對付財政司司長，談何容易。反之日前李嘉誠專訪中所展示反民粹主義，抨擊情緒政策化，就表現咗對曾俊華理財原則嘅支持。
梁要架空財政司司長及政務官決策權，搞出N個法定諮詢架構，意圖影響政策制訂，大家望望大嶼山圈地運動中，新成立嘅諮詢委員會，茂波做主席，搵幾條左佬、鄉紳，加上劉炳章、林奮強、林筱魯、藍列群一棚梁營人馬，如此明目張膽陣容去搞大嶼山開發，搞新官紳商開發利益集團，危矣！
傳媒對呢棚人冇好感，搵劉炳章吹大嶼山概念，真係自己捉蟲，佢猛踩郊野公園乃殖民地英人狩獵所需，仲叫人行山北上深圳，呢番幫倒忙言論，反映佢根本完全唔理解中產主流價值，係典型冇能力又要做嘢之人。以前由九七前英人培育嘅親建制人士，有一定社會地位，亦會自重身份，唔會亂噏當秘笈，好多爭議都靠夏佳理、梁智鴻、張建東、鄭慕智等幫手解畫，做third party endorser；九七後退而求其次，陳智思、范鴻齡都總好過一棚古靈精怪梁粉。劉炳章等人冇standing，點可能為政策背書呢？唔單止冇用，反而削弱政府立場公信力。
梁粉涉龐大開發利益
大嶼山開發涉龐大商業利益，由一班梁粉去主導，將來定必引起嚴重利益分化及輿論猛烈抨擊。唔信？大家不妨重溫2005年審計報告對當年大嶼山愉景灣發展補地價質疑，而涉事者包括梁之政治mentor鍾逸傑，現任行會成員兼金融發展局主席查史美倫夫婿家族企業香港興業（480）。原來根據當初發展計劃，愉景灣是被明文規劃作度假用地，但後來發展卻變成豪華住宅用地，更奇怪是多年來政府從未要求補地價，而當時鍾逸傑正任新界政務司。1987年鍾退休後續與香港興業合作，於2000年獲委為查氏家族企業名力集團的獨立非執行董事，而早在1999年鍾便公開倡議港府開發大嶼山。愉景灣由一角偏僻荒地，廿年時間變成一個達80億元巨額地產王國，關鍵人物就係查濟民與鍾逸傑。
鍾sir九十年代成立工商專聯，意圖仿效日本「經團連」，推動「政商合作」，創會會長瑞安集團羅康瑞，近日在機管局內為搶建航天城商場，便不惜同主席張建東反面，而羅康瑞乃下任機管局主席熱門人選，主宰大嶼山機場用地發展。梁系人馬都不同程度涉及大嶼山開發利益，一個新利益集團經已浮現，只不過大家忙於政制爭拗睇漏眼！
添馬男