上年10月15日主打華夏醫療（8143），到噚日最高累積大升近3倍！創業板尋寶，好似華夏有咁好嘅爆炸力，有大賀傳媒（8243），H股市值得9,000萬銀，輕輕翻半番，仲係得1.3億銀鬆啲，仍然殘過殼股！
大賀主打戶外媒體廣告及終瑞傳播業。客戶包括中國電信（728）、中移動（941）及蒙牛（2319）等，全部頂級磅數。集團呢期兼成功拍上「新浪網」，合作建立「新浪江蘇」。
大賀有堅到爆嘅客戶網，夥伴新浪網江湖地位，呢次將業務推到去潛力十足嘅新媒體，呢一點，先至爆炸。
PB僅0.69倍大落後
大賀有咁嘅背景質地，但現價（0.36元）貼近2003年11月上市以嚟歷史低位，相對上市價0.53元潛水逾30%，另2007年高位1.2元大潛水70%，H股市值得9,000萬銀，兼只係合作夥伴新浪網376億港銀市值嘅0.2%，連零頭都不如！大賀俾求其一家電貿大佬，或互聯網大孖沙睇中，要買起佢，容乜易？
大賀PB得0.69倍，夥伴新浪網4倍PB。就算以戶外媒體同行做比較，場內白馬戶外媒體（100），PB講緊1.5倍，祖國行家北巴傳媒PB，上到兩倍，大賀又係平咁截。
大賀2013年度頭九個月純利1,000萬銀人仔，已經超過2012年成年純利886萬銀人仔。
照計，集團2013年度業績，應該靚仔，預測PE分分鐘跌到得15、16倍，又係相對創業板指數（GEM）32倍PE，折讓過半。
大賀翻半番到0.54元，PB都係1倍多少少，未有耐追到夥伴行家同時，亦未有耐上到GEM兩倍PB水位。
錢雋
細價股專家
本欄逢周二、五刊出