強國旅霸嚇到全球怕怕，不過澳門人就話香港人先最難服侍呀。近期有位自稱「澳門酒店小職員」嘅網民，話香港客成日小小事就拍晒台，發嬲叫經理，七情上面其實為𢱑着數，𢱑到之後，仲會不其然咁跌咗個勝利笑容出嚟，公開呼籲香港人唔好做「cheap客」、「賤guest」、「R（𢱑）友」。雖然原文喺facebook刪咗，但係網民早就截定圖，不停轉載將篇文發揚光大，大大話話都有幾千個like。究竟香港人去旅行係咪真係咁惡頂？旅議會主席胡兆英就覺得，香港人去慣旅行絕對唔難服侍，冇乜聽聞其他地方有投訴，反而覺得啲「鍵盤戰士」上網鬧人，實會加多幾錢肉緊，信不信由你。