浸會大學校長陳新滋明年約滿，今年6月就要決定去留。陳新滋早前講明，如果爭取唔到李惠利地皮畀浸大就會辭職，噚日城規會聽公眾對恢復李惠利地皮做「政府、機構或社區」（GIC）用地嘅意見，佢就盡地一煲，組成咗一個45人申述代表團，搵嚟5個現任或前任校董會主席級人馬、前任校長吳清輝等等，一次過晒你冷。不過，佢爭取地皮就未必咁樂觀啦！
陳新滋日前喺北京接受本港傳媒訪問時，就自爆喺官場冇乜朋友，同政府官唔夠friend，搞到好難爭地，一直冇渠道就李惠利事件同政府溝通咁話喎。嘩！講呢啲？八方就覺得，有政治智慧嘅領袖，未必會咁容易吐真言囉。