香港𠵱家主要有中央證券（Computershare）同埋卓佳（Tricor）兩間過戶處，雖然都喺灣仔，但分別喺合和中心同埋金鐘匯中心。本月底卓佳過戶處就會搬埋去合和，持有多隻股票嘅小股東以後辦股票手續就唔使兩頭走嘞。
雖然家陣好多人上網理財兼買賣股票，但係仲有唔少公公、婆婆小股東需要利用過戶處服務，好似問吓上市公司幾時派息之類，亦有小股東需要將股票轉名，所以平日都有好多人走上去過戶處。
中央證券喺合和中心多年，卓佳原先租用太古廣場三期，2011年底轉租合和接近7層，包括19至24樓同埋54樓，舊年9月大部份部門搬晒過去，喺金鐘匯中心嘅過戶處本月底租約期滿亦會搬埋去合和。如果持有嘅股票分別用呢兩間過戶處，小股東辦手續就方便好多。