東亞銀行（023）最近以月租百萬元，將中環德輔道中重建項目嘅地舖連一樓，合共6,000平方呎嘅舖位租咗畀韓國品牌三星（Samsung），實行以大牌子帶旺呢個項目，又畀三星首度佔領中環，唔知東亞主席李國寶係咪三星粉絲呢？
舖位屬東亞重建項目
三星跟蘋果近年鬥得難分難解，但係大家有冇發現，蘋果在港開咗幾間萬呎巨舖，都未見三星有乜行動。三星𠵱家主要喺大約10個大型商場開partnershop，同電訊商合作主力賣手機，唔算得上旗艦店，仲多數位於九龍同新界。
三星今次係首度喺中環插旗開partnershop，租咗東亞銀行喺德輔道中、前稱中國聯合銀行大廈嘅重建商廈，地舖連一樓，建築面積共約6,000平方呎，呎租超過160元。整個重建項目樓高25層，地下至五樓係舖位，樓上就係寫字樓。
聽聞，三星佔領中環後，繼續物色緊兩、三萬呎嘅巨舖，點都要喺香港開間旗艦店咁話。咁又係嘅，頭號對手美國蘋果公司在港已經有幾間萬呎巨舖，家陣三星一間都冇，認真失威。不過一線巨舖供應極罕，好多跨國品牌都吼實晒，假如要搶贏，唔出天價租唔成。
聽地產代理講，三星租舖嘅要求都好嚴格，唔大唔四正、地段唔正都唔要，好似銅鑼灣波斯富街前泉章居舊址，舊年租畀先施（244）之前，有代理曾經搵三星承租，最終冇租到。
李華華
mailto:[email protected]
