上周如攞住支槍指住孫柏文個頭問：「大陸又有債券話會違約走數，係咪真係會？」我一定答：「唔會！因又有白武士打救！」上幾次話大陸會有產品、債券走數，最後都有人救；但估唔到今次真係有隻上海超日太陽能出嘅債券走數，冇人救。令我今日要大聲叫大家不問價追中國信達（1359）！
噚日滬、深、港股市同人民幣一齊勁跌，你估係因飛機跌落嚟？肯定係單違約同之後大陸啲非政府債息飆升啦。銀行同業拆息、國債息率唔升，但非政府債券息飆升，意即喺影子銀行系統借錢嘅公司好多會走數。
點解追信達？因佢係財政部專做追壞賬清理生意嘅部門，當資金氾濫時，所有人可借新錢冚舊數，佢根本冇生意可做。但今次真係有公司走數，系統越亂就越多優質嘅壞賬出現。我咁講係因信達喺舊年底在呢浪信貸整治集資上市後係咁升，由首日4.5元升到1月中嘅5.5元，同期大陸嘅非政府債券息率又係一路飆，又喺1月中見頂。咁1月中發生乜事？就係之前一路話1月尾將會有隻叫「誠至金開」產品走數，點知喺1月中話白武士出手救。之後話會爆嘅嘢都有人救，甚至到上周啲大行分析員仲話第一隻真係爆會喺5月囉！
料可重上5.5元
所以信達股價，由原本仲估好多生意到上周洗倉絕望。點知當共產黨眼中嘅精英聚晒喺北京為兩會開會之際，中央就篤爆第一隻產品，等你班土霸收到個message，就係資金分配失衡會拖垮主權，一定要整治。故對上兩個交易日，股市、大陸非政府債價、人民幣跌，但信達股價就兩支陽燭係咁升。唔識嘅人睇恒指掟信達出來，點知多多都有人接，嚟緊幾日將會有好多大行相繼出報告用我個point重申叫買信達。因上周洗倉跌得急跌穿首日價，所以彈時亦會急，大家要買就要快，睇佢升返上5.5元，不問價追信達！
孫柏文
獨立股評人
http://facebook.com/shuen
本欄逢周二刊出