有追開本欄嘅戰友都知道，唐牛一向鍾情破頂股，始終強者越強乃近年主旋律。今日罕有推介剛創52周新低嘅中國泰豐床品（873），事關有齊估值平、影子股及分拆概念，反彈浪一觸即發！
如果話畀你聽，付出1.24元嘅價錢，可以收番1.56元現金之餘，兼有床上用品及棉紗業務免費奉上，你一定會話，邊有咁大隻蛤蜊隨街跳。但泰豐乃活生生例子，現價1.24元，但每股淨現金達1.56元，超值到冇朋友！點解會咁平，因為集團早前預警，去年業績將低於2012年，但最壞打算去年下半年冇錢賺，單用中期盈利計，現價市盈率僅3.8倍，平得可憐。
可能你又會話，殘股只會越殘，冇咁易彈得起。但泰豐而家有兩大催化劑，足以上演一幕醜股大翻身！第一，經銷太空棉床上用品嘅Sinomax已通過上市聆訊，計劃月底掛牌，集資7.8億銀，屬細細粒容易炒一族，必定惹來資金追捧；泰豐乃全國第七大床品製造商，銷售網絡覆蓋29個省市，炒影子股概念別無他選。第二，泰豐早前表示，有意分拆其棉紗業務獨立上市，一旦成事，潛在價值可全面釋放。泰豐9 RSI已跌至近20嚴重超賣水平，反彈幅度可以好驚人，乃小注博大贏佳品。
唐牛