市場上月盛傳，德銀大中華區首席經濟學家馬駿，將跳槽人行任研究局首席經濟學家，仲話進入最後程序，但暫時未見任命。噚日見個市立立亂，致電馬駿諗住問佢意見，點知佢話最近好忙，冇留意市況，又自爆已經冇喺德銀返工。至於有乜去向，佢就話「不方便透露」，相當神秘。
喺德銀任職前，馬駿曾於世界銀行同埋國際貨幣基金組織（IMF）出任經濟學家同高級經濟學家，如果過檔成功，佢將成為人行近年來少數嘅外聘人員之一。
有消息指，首席經濟學家係人行旗下研究部門新設嘅職位，圍繞貨幣政策，對經濟增長與運行進行分析同預測，對股市自然毋須睇得咁緊。
查實投行人來人去閒過立秋，貝萊德噚日亦宣佈，已委任朱悅（Helen Zhu）擔任董事總經理兼中國股票投資主管，Helen之前效力高盛八年，曾擔任董事總經理兼首席中國股票策略師。