Tree根唔睇文件開會早有前科，呢個陋習唔知佢改咗未呢？噚日立法會資訊科技及廣播事務委員會開會，討論港台數碼電視廣播，輪到Tree根哥提問，佢居然問起港台幾時將AM/FM電台廣播轉晒做數碼聲音廣播，又或者有冇政策將兩者合併，免得浪費資源。明明講緊電視又突然轉話題，商經局常秘何淑儀雖然𢱑晒頭但都照答，然後Tree根居然打算追問，主席毓民終於忍唔住出口叫停，叫常秘唔使再答，「由頭到尾都講緊電視你走去講電台，睇文件啦返去！」有份開會嘅單雞口多話Tree根抵鬧，Tree根就反擊話「你哋開會夠成日離題」，仲死撐自己唔係冇睇文件，而係專登趁有機會就追問，係真係假，各位市民自己判斷。