講指數無謂，反正二三線及細價股是另一個世界，即刻入正題！上日推介同方泰德（1206）逆市創新高，表現硬淨無比，本月業績前可望上闖5蚊關。再提一次，其估值與同業比較平一大截，加上盈利穩增，波動市中值得吸納。
騰訊（700）入股京東商城，華南城（1668）借勢起錨，隨着中信21世紀（241）轉弱，不排除熱錢大規模換馬華南城，締造另一爆升神話。再者華南城預測PE不足10倍，盈利連年增長，市賬率唔夠2倍，結合電商概念可謂如虎添翼。
想炒細隻啲，茂盛控股（022）突破1月高位，蓄勢爆炸式向上！去年中期純利4,633萬銀，按年飆升74%，全年盈利有望逼近1億元，意味現價預測PE僅4倍，真係超級平！快炒一轉，目標5毫。
細價醫藥股全面喪炒，魏力掘到隻平靚正嘅海王英特龍（8329），3.5億市值，殼價多少少，但係做緊極專門的胃癌藥，仲要賺唔少錢！公司剛出通告，旗下隻胃癌藥已獲中國藥監局批准註冊，年內有得賣，仲要係獨家劑型，盈利勢將火箭式上升！去年首三季賺3,810萬人仔，當全年賺4,000萬人仔，預測PE係7倍，咁平去邊搵？
該股昨大棍突破橫行區，創兩年半新高，快現霹靂升浪！料新藥貢獻顯著，目標睇升1倍：1.66元。
魏力
http://www.facebook.com/2012jason