【九龍城】最近人氣急升的王菀之（Ivana）同Figure王蘇卓航（Eric So）撻着，雖然相戀嘅時間唔係好長，但有指已進入半同居階段，佢兩個亦越嚟越有夫妻相，不約而同都係矇豬眼，真係天生一對。
個唱賣性感
前日4點幾，Ivana同Eric一齊喺男方位於九龍城嘅屋企出嚟，兩個全黑打扮好合襯，Ivana戴咗冷帽，不時刻意耷低頭，但唔少街坊都認出眼望望。Ivana同Eric睇嚟啱啱起身，一落樓先去附近嘅點心店醫肚，坐低即叫嘢食，Ivana邊食邊同男友傾偈，似有講唔完嘅情話。
食咗成個鐘，Ivana同Eric就轉去其他地方，不過都係屋企附近嘅泰國食品店，見Ivana買咗唔少材料，似係打算返屋企煮飯仔撐枱腳。一向為食嘅Ivana食完點心都唔夠飽，再拖Eric去咗一間有賣傳統小食嘅麵包舖，又買咗啲小食，跟住仲唔夠喉，再去麵包舖買包，最後同Eric返屋企過二人世界，見佢哋成日蹺住手又傾唔停，Ivana仲十指緊扣咁貼身箍實男友，認真肉緊。
拍拖之餘，Ivana亦都努力工作，噚日佢着低胸裝喺尖沙嘴出席演唱會記者會，問佢個唱上啲歌衫會唔會仲性感？佢笑話：「如果少布就係性感，咁就會更性感！」有冇問准男友先？Ivana話：「男友都有讚我喺《金雞sss》嘅演出，佢話最緊要專業。」
採訪：李志明、藍文浩
攝影：徐錦池、陳慧安
