自從阿信屋崛起，唔少人都視佢為抗衡大財團嘅希望；而佢能以單一品牌踩入唔同市場，靠嘅就係深得民心，所以如果阿信屋商譽出任何問題，真係隨時Game Over。
早幾日同人傾開偈，先知原來網傳阿信屋間化妝品店Kawaiiland賣假貨。有網民話喺舖頭見到美國牌子Urban Decay眼影組合其中兩隻色，係連品牌官網都搵唔到，懷疑係假嘢。菲菲當然搵林老闆求證，佢隨即大呻冤枉，話早就再三查證，可以肯定啲貨珍珠都冇咁真！
佢話批貨經香港一間大型代理攞返嚟，點知上架冇幾耐就見有人咁傳，佢當然拿拿臨將所有貨落架，然後搵個代理問清楚。個代理就誓神劈願話貨的確係Urban Decay出品，於是佢哋直接走去問生產商；但生產商過咗好耐後，只係send個網址畀阿信屋，指出美國有賣上述兩隻色，只係現時已落架，咁就解釋點解官網冇顯示。
事件雖證實只係虛驚一場，不過林老闆都話今次事件令佢驚驚。佢話雖然知代理今次冇跣佢，但佢始終係新仔，都係要保守啲好，所以要提高警覺，以後減少經香港代理採購。阿信屋業務越做越廣，自然得罪唔少既得利益者，當中仲有唔少大財團對佢虎視眈眈，未來亦有可能再傳出負面傳聞，到時就要睇林生點見招拆招。
Fifi
本欄逢周二、四刊出