日本UNIQLO的母公司迅銷（6288），其HDR上周掛牌。管理層當日分享剛進入中國時嘅失敗經驗，稱司曾一度想和對手鬥平、割價，無諗清楚自己嘅定位，搞到年年虧損，坦言交咗唔少學費，才有今日成績。這番話令海迪回想起2006年時，迅銷曾經想收購佐丹奴（709）一役。
當年佐丹奴為力阻迅銷入主，在背後不斷發功，落足嘴頭說服長線基金，話自己品牌策略、定位清晰，希望芬佬們支持現有管理層。最後，佐丹奴如願以償，單deal見光死，迅銷自行撤退收場。而作為打工仔的佐丹奴主席劉國權，亦成功保住份工。
八年過去，迅銷當年在大中華區幾乎由零開始，到去年度銷售額高達91億元，經營溢利近10億元，公司仲預測今年度生意會再升30%。咁佐丹奴呢？去年大中華區營業額約35億元，經營溢利3.3億元，內地的生意去年越跌越急，幾時可翻身？唔知。
佐丹奴已經迷失十年，品牌長期想升呢，卻高不成低不就。
以內地為例，過去幾年公司一邊說要upgrade，一邊卻進入大量低端超市渠道，這算係乜嘢定位？管理層最近又話，未來兩年要佐丹奴加價10%至15%。
但公司出名慳家，又唔肯使錢投資在產品、宣傳上面，咁點樣提升品牌價值？如果海迪係柳井正，睇到佐丹奴現時咁嘅景況，會慶幸自己當日好好彩，買唔到佐丹奴。
海迪