【維基開台倒數112日】香港電視網絡（港視）開台一波多折，由於日日燒銀紙，身為港視老闆的王維基惟有被迫向即將滿約的合約藝人減薪及減續約年期，而原定本月開拍的《人生盛宴》、《復仇》及《十分一》，也有傳疑因資金問題喊停。
雖然王維基縮減開支，但就變相令旗下藝人有上位機會，事關港視為開源節流而減少找外援拍劇，盡量起用自己人，令港視藝人機會大大增加，如去年在政總扮半澤直樹出位的陸駿光，便有機會升呢做男主角，一嚐入行12年的心願，據悉他將在今年8月與周家怡合作拍攝的新劇《The Family》中擔正做男主角；而《復仇》本也安排陸駿光做男一，但目前有關劇集要押後開拍。
對於獲安排在《復仇》做男一，陸駿光昨在電話中說：「其實未firm嘅，我聽番嚟係有考慮過用我，但最後決定我就唔知啦。如果成事嘅話都係第一次擔正，但我唔敢亂講，因為都未firm。」是否在另一新劇《The Family》擔正？陸駿光說：「唔只我，仲有王宗堯同石仔（陳宇琛），幾個拍住上。」
《警界線》未播開續集
港視疑因資金問題影響找外援，造就旗下藝人演出機會大增，對此陸駿光說：「咁反而對我哋公司藝人係好事，多啲機會，開心㗎。」對於多位藝人跟港視續約也要減薪，陸駿光自言較好彩：「我比較好彩，因為下年先至到期。好似威威（艾威）話齋，公司呢三年都係有出冇入，都體諒公司嘅。」
目前港視正開拍劇集《大眾情性》和《惡毒老人同盟》，蒙嘉慧和林文龍主演的《天網》將於月底開工，而《警界線2》則於下半年度開拍，同時陳嘉桓也會為港視拍新劇《再生B & B》。
採訪：白白
