熱刺上周六被車路士大炒後,領隊舒活(後)心情欠佳,大家可以理解,但佢最近連主席利維(前)都夠膽寸,就幾令人意外。由於外界一直傳熱刺今夏會搵雲高爾接手,而利維又冇開腔澄清,搞到舒活都唔知自己下季有冇得撈,於是趁接受訪問嗰陣,就乘機批評呢位主席唔好以為唔出聲就可以解決問題,又話唔知點解對方冇嚟睇對車仔場波。句句有骨,睇嚟舒活下季都係要執包袱走佬!