大熱韓劇《來自星星的你》播完，唔少人相當失落，亦有人飲恨喎！港產手錶生產商時計寶（2033）主席董觀明噚日就大呻，喺呢套劇出街前，跟男主角金秀賢傾緊代言人合約，點知套劇播放後大受歡迎，金秀賢身價即刻升成倍，最終簽唔成合約。
董觀明透露，最初有經理人介紹金秀賢畀佢，開價約500、600萬人仔一年，幫公司隻天王錶代言，不過佢都未考慮完，《星星》就已經出街，仲要紅得好緊要，經理人即刻加價到超過1,000萬人仔一年，本身都相當豪氣嘅董觀明講笑咁講「真係賣白粉咁好賺」。
其實，時計寶舊年在港上市後，就不停搵緊天王錶嘅代言人，但始終都冇着落。相反，另一款手錶「拜戈」一直由藝人黃宗澤代言，董生話啱啱同佢續咗兩年約，算係搵到戶好人家。