離開咗無綫嘅陳法拉，拍電影又接搵真銀嘅job工作不斷，難得跳出公仔箱，佢上月去咗美國同家人度過32歲嘅生日同埋放悠長假期，足足放咗兩個月，佢都話嚟緊要正式回歸香港，到時就知法拉會花落誰家。
放假法拉都接job，好似早前佢為雜誌《大日子》影咗輯靚相，不過法拉冇着婚紗，反而攝影師為佢塑造多個女神look。法拉話以前拍戲試過好多次着婚紗，反而聽到女神look就有啲唔好意思：「其實我都只係一個好普通嘅女仔，唔係乜嘢女神，一係扮女巫我都接受到OK㗎。」如果有個咁靚嘅女巫，相信有好多人爭住想親近。
尋愛甘於平淡
充完電嘅法拉着上多款晚裝明艷照人，之前佢同Neway太子爺薛世恆分手後，暫時感情都未有着落，不過法拉似乎未係好心急尋覓另一段感情，但對於未來嘅感情，佢話：「我只想要幸福平淡嘅生活，開心先係最緊要。」
撰文：馮仁昭