政界中人一講起胡志偉,八九不離十會都聯想到民主黨立法會議員胡志偉,但喺民主路上走得更前嘅,仲有香港教會更新運動總幹事,都係叫胡志偉。呢兩個胡志偉,噚日喺和平佔中商討日(二)總結及前瞻大會上相遇兼相認,原來佢哋本身唔認識對方,只喺某年7.1遊行時見過,但因為同名同姓,不時鬧出笑話。胡志偉牧師話,好似噚日去佔中集會報到已經俾人搞錯佢係白鴿胡志偉,每到選舉年又會收電話問佢係咪參選,佢仲不時收到資訊科技界立法會議員莫乃光嘅電郵,但一睇內容就知又搞錯,真係得啖笑,所以佢𠵱家出席活動,名牌一定加「牧師」二字。