「Bitcoin之父」羅生門有新發展，俾美國《新聞周刊》搵出嚟嘅中本聰，上周四接受美聯社訪問時話自己同Bitcoin冇關，不過日前警方發表聲明，力證《新聞周刊》嘅文章內容屬實，令事件更撲朔迷離。
《新聞周刊》記者古德曼上周上門訪問中本聰，當時中本聰話自己冇再參與嗰件事，不能討論，𠵱家交由其他人接手。古德曼話「嗰件事」係指Bitcoin，但中本聰之後對美聯社話，佢只係話自己唔再參與工程工作，佢連Bitcoin係乜都唔知。
加州警方就指《新聞周刊》引述嘅對話係真嘅。事關當時中本聰唔想接受古德曼訪問，兩名警長接報到場，兩人喺警長面前簡單對話，內容同報道一樣。聲明又話，其中一名警長聽完古德曼解釋後，真係講咗句「佢就係創造Bitcoin嘅人？」