中法建交50周年重頭戲之一，就係首次喺內地展出印象派大師莫奈（Claude Monet）真迹。呢個名為「印象派大師．莫奈特展」上周六喺新世界發展（017）旗下上海K11揭幕，商場B3一層由藝術館變成博物館，展期至6月中。
展覽保安非常森嚴，幾乎每百米就有一個保安站崗，而且限制每日最多3,000人入場，聽講3月門票一開就爆，𠵱家只能買到4月至6月門票。
今次展出55件展品，當中40幅係莫奈作品，3件係佢嘅用品（調色板、矯視眼鏡同煙斗），仲有12幅就係其他印象派畫家作品。
聽聞今次有其他博物館爭辦莫奈展，點解最後揀K11？巴黎莫奈美術館助理館長Marianne Mathieu解釋，喺佢眼中K11唔係一個商場，而係一個位於市中心、畀上海居民隨時接觸藝術嘅地點，氣氛適合。