從前有個食衞局局長叫高永文，佢嘅嗜好呢就係食廚餘……廚餘？你冇睇錯、我冇寫錯，的確係廚餘。噚日局長出席浸大一個宣傳有機食物嘅活動，自爆自己成日食廚餘，仲叫自己做「有機廚餘機」㖭！
大家唔好以為食廚餘就等於打開垃圾桶摷垃圾，其實局長係話自己周不時都夜晚11、12點先返屋企，家人就梗係唔會等佢食飯啦，佢只好一個人打開雪櫃，整番熱啲餸頭餸尾嚟食咁話。
同場出席嘅，仲有特首夫人梁唐青儀。同為惜食之人，局長同狼太喺食緊大會準備嘅有機早餐時，全程雞啄唔斷，一邊傾一邊食。而局長喺離開接受記者訪問前，明明企咗起身，都彎腰同狼太say goodbye，認真識做。
噚日浸大香港有機資源中心亦都公佈咗個調查，佢哋喺全港街市抽查咗117個蔬菜樣本，全部合乎香港標準，但有8個來自內地嘅樣本，重金屬含量就超出國際標準，其中一個西蘭花樣本銅含量更加超標15倍！中心主任黃煥忠同八方講，香港標準比國外寬鬆，又話部份重金屬會黐喺塵度，煮之前洗乾淨啲都有幫助咁話。