上周六，巴塞隆拿又中最驚嘅「FIFA病毒」，西甲作客護級分子華拉度列，竟以0:1輸波，爆出12.5倍主W，踢完國際賽嘅美斯、尼馬等表現低迷，未來將成為巴塞後防大佬嘅碧基，完場後更被激進球迷組織掟銀仔！
0:1不敵華拉度列
巴塞經常喺國際賽後失準，今仗賽前更有恩尼斯達因太太小產要急急腳去醫院，球隊中場冇咗靈魂，就算有沙維同法比加斯兩位西班牙國腳，始終都差啲，半場有77次誤傳，係球隊今季新高，結果華拉度列把握巴塞解圍失誤，17分鐘由法奧斯圖羅斯門前建功，以1:0領先，亦都係巴塞今季聯賽首次半場落後。換邊後，代表阿根廷踢到嘔嘅美斯仍未有起色，教練馬天奴領軍能力之前已備受質疑，下半場再換入基斯甸泰路同阿歷斯山齊士，同美斯、柏度洛迪古斯打4箭頭，不過唔係前鋒多就有波入，華軍死守下保住1:0勝果，令巴塞尷尬咁作客兩連敗。
數一數巴塞踏入2014年已經失咗13分，領先優勢冇晒，同日馬體會擊敗切爾達後，巴塞更跌到第3，亦都好大機會俾皇馬拋離。中場沙維賽後話：「場地草質好差，影響發揮，當然己隊表現都唔好。今次係一場心痛嘅失利賽事，我哋要及時振作。」
碧基慘遭掟銀仔
佩奧爾上周宣佈今季完結後就離隊，巴塞未來後防領袖順理成章係27歲嘅碧基。不過呢位闊少似乎仲未有做大佬嘅準備，特別同歌星老婆Shakira嘅場外花邊新聞，令球迷更加不滿。巴塞激進球迷組織Boixos Nois，上周六完場後就向碧基指罵同掟銀仔，不過好彩銀仔只掟中鏡頭冇中人。但Shakira好似唔識收口，接受訪問時講，碧基唔畀自己喺MV同男性有親熱舉動，所以只好揀女仔，我求大俠就奉勸碧基，先踢好啲波至好搞咁多花臣。