無國界醫生野外定向活動噚日喺長洲舉行，不過就有人「未出發，先失蹤」，大玩無定向放飛機喎，佢哋全部都係政界人士，包括立法會議員、政治助理同副局長，啲議員又話病又話臨時有事，政助同副局仲冇解釋原因，結果搞到七隊名人隊中，得番五隊作賽，最終由香港醫學會代表隊以大熱姿態捧盃。
今年無國界醫生野外定向，以上年11月發生嘅菲律賓風災為背景，務求等參加者恍如置身救援現場。「公民袋」陳家洛同兩個囡囡，加埋白鴿黨胡志偉組成嘅議員隊，全隊退賽，連入閘都入唔到。家洛話佢病咗，胡志偉就話要參加佔中商討日，所以至甩底。
政助隊消失冇原因
由運房局嘅副局邱誠武帶領嘅副局政助隊，就更加冇誠信囉，放飛機之餘，仲冇交代原因，淨係日前話自己同民政局政助徐英偉，以及保安局政助劉富生講咗有事唔嚟，全隊退賽，十足平時政府回應咁，資料透明度相當之低喎。
八方建議佢哋，甩底可以解釋話自己去咗體察港鐵擠迫情況，點知遇上壞車，等多10班車都上唔到，想轉搭巴士又脫班，仲有官員喺巴士站前停低座駕上落客，搞到大塞車，趕唔到搭船去長洲。咁符合社會實況嘅解釋，實有人信喎。
李八方
mailto:[email protected]