要喺股票市場生存，除咗實力，運氣都不能缺少。兩隻新股──瀚華金控（3903）及新豐泰（1771）異口同聲表示，因為市況波動押後上市。
兩股上市觸礁，明顯與上周俄羅斯疑似出兵烏克蘭有關，唐牛身邊唔少追逐新股嘅戰友，都齊齊打退堂鼓。事實上，只要事件遲一個星期發生，以當時新股嘅熾熱程度，要超購數十倍甚至百倍難度不大，可惜抽咗嘅飛就好似潑咗出去嘅水，點都收唔番。
資金繼續輪流炒，科網股稍事休息，支付股及彩票股接力造好，成交動輒十億八億，唐牛尤看好後者，事關巴西世界盃已進入倒數100日，相關新聞肯定越煲越熱，彩票股夠晒催化劑炒上，御泰中彩（555）及華彩控股（1371）上周五大棍崛起，升浪一觸即發。
今日推介嘅半新股老恒和（2226），同樣屬於破頂一族。集團上周五報喜，兩間子公司獲評為高新技術企業，故連續三年享有稅務優惠，全年盈利將較招股書預測為高，保守估計盈利較預期高兩成，則現價市盈率回落至23倍，由於主要產銷調味品，行業相對獨特，故享有較高估值份屬正常。睇圖表，老恒和成功突破圓底頸線，再創上市新高，進入冇蟹貨區，以量度升幅計，上望12.6元，潛在升幅近兩成！
唐牛