主要經銷太空棉床上用品嘅本土品牌Sinomax（盛諾集團），上市計劃傳入直路，為吸引市場眼球，今日喺銅鑼灣新開嘅「Sinomax生活館」，就請來「宇宙最強」甄子丹同太太汪詩詩一齊晒恩愛撐場，真係唔打得都睇得。
據講甄子丹片酬高達3,000萬元，飯局價都要300萬元，出席活動嘅叫價必然唔會少，Sinomax如果唔係打人情牌，就一定係出手夠闊綽，唔知老闆怕唔怕上市後俾小股東鬧佢嘥錢呢？
舊年第四季市場已經傳過Sinomax打算上市，最新消息指，公司已經通過上市聆訊，計劃今個月底掛牌，不過集資額就由舊年傳出嘅1.5億美元，縮減至1億美元（約7.8億港元），招商證券係獨家保薦人。