環境局局長黃錦星上星期同立法會議員一齊去歐洲考察焚化爐，工黨議員阿Cyd何秀蘭都有份去。喺荷蘭阿姆斯特丹，佢得到來自當地工黨嘅女副市長接待；去到瑞典Malmo，接待佢哋嘅市長又係來自社會民主黨，去外訪遇到差唔多政治光譜嘅女性政治人物，都可謂他鄉遇故知啦。
阿Cyd話，Malmo市長Katrin年輕貌美，阿姆斯特丹、哥本哈根嘅副市長都係女人，身為香港人嘅佢就感慨話，香港女性從政者雖然可以喺直選跑出，但係都冇乜執政機會，時至今日，管治仍然冇婦女角度。
佢又話，同阿姆斯特丹副市長午宴，對方係相當有型嘅左翼女性，傾落原來大家都係工黨，又係有仔女嘅從政婦女，加倍啱key咁話。一個星期後就係當地市議會選舉，阿Cyd話祝佢個黨選舉順利。