黃秋生同杜汶澤一向都唔啱，間唔中仲會隔空駁火，秋生噚日同張敬軒、甄詠蓓喺演藝學院出席《EQUUS 馬》分享會，又借機會發炮鬧阿澤。原先係講起早排同阿澤因為梁振英個女梁齊昕而起嘅罵戰，阿澤仲話唔再容忍佢，秋生還擊：「唔理佢講乜啦，容忍我咩？講埋啲嘢都冇根據，我都係問佢兩個問題，佢話人無知，自己係咪知好多？話人冷血，自己有幾熱血？搞搞吓變咗唔知講咗去邊。」
「邊個同佢friend」
因為咁反面嘅秋生話：「反乜面，有乜好反？邊個同佢friend，你哋查吓呢行有幾多人同佢friend，我係最後一個離開嘅。以前我對佢幾好呀，當然佢可能唔覺得係。講包容，知唔知幾多人包容過佢，𠵱家唔再包容呀？你哋自己查吓啦。」秋生繼續講：「我唔可以代人哋講嘢，新聞都有講過，因為冇得包容喇，無謂做衰人，當講嘅嘢人哋唔啱聽咯，不過睇嚟似乎佢唔知囉。」最後秋生又話：「成件事唔係針對佢，就算唔係佢講係第二個講（指無知冷血論），我都一樣會咁問。」
撰文：馮仁昭