噚日有另一位財經界馬主拉頭馬，就係有「體操王子」之稱嘅李寧（2331）老闆李寧。李寧向來甚少現身馬場，噚日罕有帶埋妻女入場，頭場「金桂飄香」即順利開齋贏馬。
練馬師蘇偉賢爆料，今日（10號）原來係李寧牛一，於是專登將隻馬嘅狀態提至高峯，賽前有一定信心，因此請李寧入場，結果隻馬冇令馬主失望，贏馬賀壽。
蘇偉賢話，「金桂飄香」早於9月已經準備出賽，可惜突然肚痛，要開刀做手術，發現隻馬搞腸沙，不幸中之大幸係唔使切腸，將腸拉好就掂。隻馬曾經狀態非常低沉，需要時間養番好，佢喺五班有利，加上近期狀態回勇，認為隻馬有一定機會，所以噚日請李寧入場，希望隻馬為馬主帶來生日頭馬做禮物。
現場見李寧一家見到隻馬贏出，歡喜若狂，開心到不得之了。唔知李寧遲吓公佈業績，小股東有冇咁開心呢？