上周四的「卧薪嘗膽」有一讀者在本欄的專頁中留言，問「咁點解你唔叫個女去試吓？而送佢去韓國留學？」雖然問中有話但不是無的放矢，我直覺此問出於年輕人還是個男之口，既然肯問我一定答，原本準備晚上抽時間好好答他一答。怎料有深知我心的讀者搶先幫我解圍兼試答「我大膽咁估，所謂俾個女去試，我估係俾佢自己做選擇同做決定，我估韓國係佢自己揀的，Son姐錯的話請指教。」我連隨附上「like」一個！
另有忠實粉絲留言「只有經過地獄的洗禮，人才會變成百煉鋼。」那位仁兄駁言「咁你快啲去走番轉啦！」做得我粉絲果然有智慧零舍不同，即答「我去過了。」我真心相信他出生入死從地獄走出來，否則講不出那氣度兼力度。
仁兄的意圖到此經已非常明顯，在公開論壇中大家各自表態表述表達意見，百花齊放應是樂事。忠實粉絲要不是有修養，馬上反唇相稽的話，本來閒話即成了互毆抨擊批鬥，旨在傷人完全沒有理性邏輯可言，是撩打爛仔交不是切磋武藝。又不是殺父仇人甚麼血海深仇，何解總帶着仇恨心事事看不順眼、有理冇理不合己意的誓要攻擊個體無完膚咁偏激？除了窒礙了自己的學習及進步空間，抱着這種思想心態來做人，肯定做得痛苦加辛苦。為何硬是要和自己過不去咁儍？
再有讀者留言為我抱不平「有爬文的話就知人家女兒怎決定。可不是筆者如本港高官一樣：講一套、做一套。本人覺得，這篇文章低層次結論：總有出頭天。中層次結論：天將降大任於斯人，必先勞其心智餓其體膚。高層次結論：修身齊家治國平天下。」有讀者若各位，夫復何求我還有何憾？
張慧敏
http://www.facebook.com/HKcareerdoctor