除咗艾沙倫嘉爆冷出局外，印第安韋爾斯網球賽嘅女單第2圈戰果都算正路，李娜（右）同舒拉寶娃都順利打入第3圈。月前贏得澳網冠軍嘅娜姐，上周六面對住同胞鄭潔（左）都冇手軟，直落兩盤6:1、7:5贏波。另一邊廂，舒娃就贏得更加輕鬆，用咗66分鐘就贏咗德國對手佐芝絲6:1、6:4，入到4強對娜姐嘅話，應該會有一番惡鬥。