環顧當今足球壇，除咗一早已經上神枱嘅咸爺，男神呢個榮譽相信離唔開C朗、費托等幾位公認靚仔。但本人嘅心水推介係湯馬士梅拿：佢雖然冇電眼或者四十吋胸肌，詼諧面孔上最有標誌性嘅就係個大口。女人口大食窮郎，但換轉係男士，口大唔一定趕客；尤其鬼仔，出自血盆大口嘅燦爛笑容實在份外迷人。而大口湯疑似天生太樂觀開朗，永遠都係笑笑口，真係聞者開心見者流口水……
除咗迷人笑容，大口湯嘅低調亦吸引。拜仁隊內最紅嘅球星係列貝利、洛賓，最受歡迎嘅德國本土球員亦未輪到佢（據非正式統計小豬、拿姆先係王道）；球場上表現不比任何一位隊友遜色，但就永遠唔會成為頭號人物。但佢冇博出位、扮大牌，默默地做個無名英雄，盡顯務實型男士獨有魅力。而拜仁啱啱就憑佢嘅頭頂腳踢加助攻，輕鬆大炒狼堡6:1，德甲冠軍十拿九穩。
距離感固然吸引，但親民嘅男神更值愛慕。大口湯好勤力咁經常update fb，分享賽後感想，放假又晒家庭溫暖，令人好想加入成為佢家庭一分子……
文：紅烽
以女性角度看球星新聞，唔用眉筆用原子筆寫低球壇百態！