「禪師」積遜自2011年季尾離開湖人後，似乎已經唞夠，有傳佢準備重出江湖，不過就唔係返湖人食回頭草，而係去紐約人幫手執吓班波！據報紐約人總經理史堤夫米斯早前搵過積遜，邀請佢出山做教練，頂替任內成績不濟嘅活臣。禪師暫時仲未有決定，據講下個禮拜就會有消息公佈；雖然積遜之前表明想做大權在握嘅管理層，不過佢亦唔排除做一陣教練先，帶領球隊走出低潮。
安東尼發威大炒爵士
換唔換教練暫時就未知，但一班紐約人球員喺上周五NBA常規賽對住爵士就搏晒命，最終主場大炒對手108:81。其中帶病上陣嘅「甜瓜」安東尼入咗29分兼交出今季個人最佳嘅8次助攻，加上中鋒真達拿造出16分同11個籃板嘅「雙雙」，帶領紐約人兩連勝，為之前7連敗止一止血。贏波功臣甜瓜賽後接受訪問，就話自己對積遜出山教紐約人嘅傳聞毫不知情喎。
想學萊利做高層掌權
積遜之前因為健康問題再次離開湖人，今次打算出山，據講佢意屬係做話得事嘅球會高層，好似熱火嘅萊利咁有實權去管理球隊事務；如果有需要嘅話亦唔介意喺過渡期暫時做住一陣教練先。照咁睇紐約人似乎都幾啱佢，話晒積遜喺球員時代都效力過紐約人，兼兩度贏過總冠軍㖭。對於積遜將會取代佢個位嘅傳聞，紐約人主帥活臣就話：「到呢一刻為止，我仲係紐約人教練，我唔會對任何有關積遜嘅傳聞作出回應；我嘅工作只係帶領球隊打好波。」
