中國羽毛球男單嘅諶龍同女單嘅王適嫻雖然一直唔肯承認戀情，但全國上下一早已經認定佢哋係新一代神鵰俠侶。呢對俠侶亦冇辜負到一班球迷，喺全英賽順利孖住入4強。其中諶龍贏得算驚險，喺先失一局下激戰超過一個鐘先反勝丹麥對手。佢嘅另一半王適嫻晉級就輕鬆好多，直落兩局贏咗印度嘅思恩拿，中國隊亦順利喺女單4強入面佔到3席。