傳說有一間名校，曾經威盡學界，游水田徑乜球物球都搶盡風頭，讀緊嘅同學仔個個返學都抬高個頭，放學亦唔會除咗個校章，因為學校個名響，人見人愛，車見車載，唔係讀緊嘅街坊子弟，就千方百計都想插班轉校，你羨慕，佢妒忌，名校就係一個咁令人嚮往嘅地方。
其實呢間學校呢個名聽見就嚇一跳，入去參觀過你就知得啖笑，因為校園根本先天不足，不過班同學仔呢，偏偏又唔介意地方淺窄，大家都不分你我，盡情流汗，玩得不亦樂乎。老師們本來仲諗住度啲規則限制住同學仔輪流玩，之不過見佢哋自己玩得咁happy，一於「放任政策」由佢哋發揮。偶爾邊個同學仔唔好彩打爛玻璃，都係要賠錢兼留堂，但係人間有情，一人瀨嘢，其他同學仔好多時都會食少餐lunch夾埋一份賠錢，嗱，人情味就係咁建立。
不過呢間名校到最近已經一落千丈，皆因學校轉咗校長之後，學校決定唔再畀咁多空間同學仔，兼且為佢哋「好」而幫佢哋轉科，踢開波嘅去唱歌，打開籃球嘅去朗誦，而學校仲話，建議第日全間學校嚴禁廣東話傾偈，一被發現就掌嘴，甚至用膠紙封嘴示眾。唔知係因為成績走下坡，定係怕掌嘴，操場開始越來越多鬧交兼開拖事件，校方有見及此，決定「從善如流」，將操場定為不准跑步及交談嘅廣場。從此以後，呢間名校會越來越少人讀，越來越少人玩，越來越少人關心，直到有日殺校為止。
KEYMAN
now TV主持