【本報訊】「城外的人拚命要擠進去，城裏的人卻想要拚命衝出來」。3.8婦女節談女人，那座圍城豈止是婚姻──那件細碼的衣服，割手拆腳要擠進去；那不可及的D級乳房，千方百計要裝出來。一身肌肉被視作無女人味；害怕被視而不見的「肥妹」脫衣舞孃；被看成「女版張家輝」的「瘦妹」健身教練，以截然不同的線條宣示自主，「世界唯一有資格去judge（評價）你身體只有你自己。」記者：張嘉雯
貼身的旗袍、大腿上若隱若現的絲襪織花，在酒吧內耀眼如寶石的Agnes，像遞煙一樣送上火紅色的名片，「Glamourita Noir」──單是藝名已令人想入非非。37歲的Agnes擁有港女少有的英國14尺碼，由自卑小肥妹，到當上內衣模特兒和脫衣舞孃，開闢女性自我發現之路，「個社會好少會提豐滿嘅女仔，好似當我哋唔存在咁，但我覺得自己身體好靚，所以想盡辦法畀機會啲人睇到」。
「小學嗰陣阿爸成日嗌我肥妹，話我人又矮，腳又短，踩到我好核突」。Agnes人生頭十多年與自卑共存，成長後念設計學院，又到英國進修，才真正大解脫，「發現我呢種身形冇乜特別，嗰刻覺得好似搵到自己個星球咁，覺得自己冇咁怪」。
別為自己的不足慚愧
為了建立自信，她發明「除衫照鏡法」，「我好鍾意除晒衫對住塊鏡，望吓自己全身，好仔細咁睇自己，慢慢自信會嚟，起碼係由厭惡到麻麻哋鍾意，到欣賞」。現在她對外間目光有「金身」護體，「次次我出街跑步，啲男人個個會咁嘅樣（頭上下搖晃），有啲仲會企定喺度睇，不過我唔care（介意），你咪睇囉……又傷害唔到我」。
她對社會的唯一控訴，是Plus size的內衣選擇太少，擁有36E上圍的她，經常被迫試38D胸罩，「啲舖頭覺得有D級賣已好勁，啲設計後面隨時闊過件背心……來來去去得白色、肉色、粉藍或粉紅色，根本冇得揀」。Agnes為此千里尋「Bra」，更一度當上一般只由外國女子擔任的內衣試身模特兒（fitting model），為馬莎和加拿大內衣品牌La Senza提供意見。
Agnes正職是設計師，平日總會悉心打扮上班，由國金中心通往上環的天橋，是她形容為「to seen and to be seen」的必經之旅，「我當行catwalk，享受其他人10分鐘注視，我當提供啲entertainment（娛樂）畀人，咁我都望人哋㗎嘛」。
跟大部份「有肉地」女郎不同，Agnes不會遮掩軀體，偶爾「不小心」消瘦，就會努力增肥，「啲人覺得手臂肥，就着有袖衫，與其遮掩，不如focus（集中）突出啲好嘢，個人會開心好多，唔好ashamed of（慚愧）自己嘅唔好」。她認為不論男女，都應細想美的定義，「我唔會覺得啲人減肥唔啱，最緊要係問呢個係社會標準，定係自己真正想要，點解啲衫咁細件，切忽肉都要揳入去？點解要咁辛苦去fit in（符合）嗰啲標準？」
「點解瘦咗先可以跳舞？」
八年前她接觸肚皮舞，「一直覺得冇人睇到我身體有啲浪費，本身我對學跳舞興趣不大，但呢樣嘢可以畀機會我將身體expose（展現）」。兩年前，她嫌肚皮舞「唔夠皮」，找上了真正的舞台「Burlesque」──沒有體形和年齡限制的脫衣舞。
Agnes由編舞、製作頭飾及舞服都一手包辦，至愛脫衣舞可以展示身體特點，「唔會因為人哋對體形嘅要求而限制你表演啲乜，你可以好似『烏wear』師奶咁、可以Glamorous（華麗）到好似徐小鳳咁、可以瘦到港姐冠軍咁，亦可以肥到肥肥咁，冇人會叫你減肥、增肥、練肌肉，點解我要瘦咗先可以跳舞？」
Agnes感謝丈夫從來無投訴，即使觀眾的焦點常落在妻子那「飯煲級」的乳房上，「我好多謝佢，佢畀好大鼓勵我，有佢作為另一半係我嘅幸運。」她和丈夫由相識結婚至今13年，恩愛不減。
