【本報訊】同樣傳揚信念，Pam選擇當健身教練，Agnes卻當上了閨房攝影師（Boudoir Photographer），希望透過拍攝身體，讓「自視過低」的港女尋回自己的真正美麗，「每個人身體都有好多瑕疵，冇人係完美，可能肚腩好肥、腳好短，imperfection（不完美）其實no big deal（沒甚麼大不了），真實人嘅身體就係咁㗎啦」。
閨房攝影在歐美流行多年，但在香港仍未被廣為接受，Agnes因為跳脫衣舞，深覺穿得靚靚卻沒有留影很浪費，於是先找朋友當模特兒做白老鼠，之後索性自己開檔。
穿內衣上陣 令客人投入
Agnes指香港女性較為保守，為了幫助客人投入，她在拍攝時也會穿內衣上陣，「叫佢哋（客人）着最鍾意嗰套內衣出嚟，可能我仲着得少過佢」。
Agnes拍攝着重神態呈現，不會要求客人擺姿勢，亦不會刻意講究技巧和燈光，「想影到個女仔最自然嘅一面，喺傾偈過程中不經意流露，等佢哋從相中睇返都覺得自己幾靚喎，平時都唔覺自己有呢一面。男性攝影師可能會高炒、影到個胸好大、腰好幼，posture（姿勢）上好多guidance（指引），但我唔係影呢啲」。
希望女性掌握身體自主
每個客人的拍攝目的不同，但Agnes最希望女性終能掌握自己身體自主，「我希望幫佢了解自己多啲，有啲人係為咗自己而影，或者畀男朋友睇，但呢個唔係最終目的，佢同你有幾親密都好，佢都唔係你，呢個世界唯一有資格去judge（評價）你嘅身體；只有你自己，其他人講乜嘢negative（負面）嘅嘢都唔重要」。