38歲嘅碧咸雖然喺上季已經引退，正式結束佢多姿多采嘅職業足球員生涯，但係佢嘅曝光率同人氣依然高企，好似前排話喺美國邁阿密搞緊班波，希望可以進軍美職聯咁話喎。咸爺啱啱又去咗巴西，不過唔關世界盃事，而係去當地出席贊助商活動。
睇相見到咸爺以全黑裝束喺里約熱內盧機場出現，佢仲毫無明星架子，自己落手推住架載咗3大個黑色旅行袋嘅行李車（上圖），疑似想低調行事。不過，咸爺始終唔係一般人，一舉手一投足都不自覺地散發出濃烈嘅魅力，即時吸引到在場嘅大批民眾向佢索取簽名；咸爺來者不拒之餘，仲同佢哋握手㖭，夠晒親民。
另一方面，英國名貴跑車製造商積架宣佈，搵咗咸爺做代言人，希望可以藉咸爺嘅名氣打入中國市場。咸爺就好識做咁話：「我不嬲都好欣賞積架，佢哋嘅設計同各方面都充滿英國嘅傳統特色。」咸爺最近又出咗自家品牌嘅限量版香水，仲喺宣傳硬照嗰度show愛女紋身；冇着衫嘅咸爺喺鎖骨度紋咗愛女Harper（哈七）個名，下面仲有象徵住自己同3個乖仔嘅「耶穌與小天使圖」，不過個紋身就俾支香水遮咗一半。