NBA周四進行拉丁之夜，馬刺主場對熱火嘅上季總決賽翻版戰，兩軍均着住寫西班牙文嘅短袖波衫應戰；面罩加短袖衫似乎不利「大帝」，勒邦占士今仗命中率低迷，球隊亦以87:111大敗畀馬刺，錄得兩連敗。
鄧肯雙雙馬刺贏波
熱火周二先作客輸畀火箭，今仗面對另一支德州球隊馬刺，發揮仍然平平；「大帝」勒邦占士呢排戴上保護面罩，殺氣騰騰，仲創個人新高單場拎61分，但今次就俾馬刺守到一戙都冇，全場投射命中率只得3成3（見附表），3分球3射全炒，只入得19分之餘，仲錄得5次失誤，就算保殊生性都幫唔到手。馬刺繼續佢哋贏波方程式，就係靠平穩，5名正選有4個得分達雙位數，鄧肯老馬有火，貢獻23分同11籃板。大帝失準賽後就埋怨短袖波衫累事，大帝話：「每次起手都好似俾人拉住，我真係唔鍾意呢種波衫。」
熱火兩連敗後，仍然排喺東岸第2位，溜馬早一日就輸波落實季後賽資格，以兩軍實力，都好大機會喺季後賽東岸決賽交手。熱火嘅勒邦占士同溜馬嘅保羅佐治，都可以話係聯盟小前鋒頭5位，可以預期兩人到時會擦出花火。不過保羅佐治早前唔知係唔係示人以弱，定係虛心求教，話今夏練習營希望搵到勒邦占士做導師，可以改善球技。
對於死敵認做矮仔，勒邦占士當然開心，仲懶大方咁講：「我絕對願意教佢，任何我能力範圍做到嘅嘢，我都願意做。」兩位死敵咁和諧，退居講波佬嘅太陽名宿巴克利就睇唔過眼，暗寸保羅佐治咁話：「喺我打波嘅年代，從未諗過向米高佐敦求教！保羅，今次你大錯特錯。」
