「呢個係我朋友！」在大堆怪獸一樣的健身器械中間，身體脂肪比例維持在5至7%的Pam，擁着拉背機高叫「My Friend」。每天清晨5時起床，風雨不改做運動，Pam視健身中心為遊樂場；練得一身緊實肌肉的她，絕不介意被視為「女版張家輝」，原因是她不單追求美麗軀體，也重視快樂過程，透過運動釋放的安多芬，是令她「很high」的一生至愛。
「〈Determination〉Personal Trainer ── PAM，44 YRS OLD」一臉細滑的皮膚、一身緊致的肌肉，如果不是有圖片說明，誰都看不出於朗豪坊Pure Fitness當健身教練的Pam今年已44歲。已婚的她自言不煙不酒，睡好覺和做運動是她保持年輕的秘訣，「冇化妝，已經好多嘢做，邊有時間搞呢啲嘢，其實為咗做運動，個人自然有紀律，會早瞓，加上運動釋放令人年輕嘅荷爾蒙，個人自然就會look younger（看來年輕）」。
37歲轉行當健身教練
「Determination（決心）」套在Pam身上絕對「冇花冇假」，每天5時10分起床，6時開始踩單車1小時，之後再進行重力訓練，合計運動1至3小時；晚上9時下班，最遲11時就會上床。每天做飲食紀錄，進食晚餐不會超過7時，假日會準備一星期24個飯盒，以糙米飯為「膽」，另加辣粉或兩隻蛋，有時加煲湯豬肉，或索性花生醬撈飯。
如此「行軍式」的生活，全因10多年前一次突然醒覺，「我168cm，最高試過去到140磅，不過可能唔止，因為去到一個位，已經唔想上磅，咁人都貪靚㗎嘛，咁我又一直鍾意做運動，咪決定認真做重力訓練囉」。經過幾年努力，她的身形明顯改變，「以前好似一般女仔咁呈梯形，即係細膊頭大pat pat，𠵱家就調返轉，由20至22%脂肪，𠵱家大概係5至7%」。
這個轉變不單改變她的身形，也影響了她的事業，本來在時裝品牌擔任營銷工作的她，在37歲「高齡」轉行當健身教練，「我發現越做越鍾意，雖然冇乜人入行係咁大年紀，但我諗佢哋睇到我個passion（熱情），我當時係quit（辭去）咗份舊工，用5個月時間再讀多啲cert.（證書），先過嚟考」。
運動帶來快樂滿足感
渾身肌肉的她，明白背後有負面批評，「但大部份做開運動嘅人都會覺得呢個線條ok喎，冇做過運動就會覺得一嚿嚿唔好睇，只係想tone（修線條），唔係想有肌肉，覺得咁多肌肉有啲恐怖，但so far大部份人都會欣賞，冇人話女仔練咁多肌肉唔好」。
她喜歡運動帶給她的快樂和滿足感，鼓勵女性多做運動，「有啲人以為做運動辛苦，其實可以諗到佢好enjoyable（享受），慢慢就會越嚟越鍾意，越嚟越覺得唔辛苦，endorphin（安多芬）可以令到個人好high，又減到壓，加埋有results，就可以enjoy life better（更享受生活）」。Pam認為即使繁忙，也要抽時間「郁一郁」，「唔好覺得少時間就唔做，係咪得45分鐘就唔做呢？唔做就冇㗎喇喎」。
為了維持身形，Pam嚴守紀律，但偶然也會讓自己放鬆，「要畀啲treat day（休息日），如果唔係會好唔開心，好似我都好為食，好鍾意食麵包，成條食當snack（零食），栗子蛋糕一次食晒成個，曲奇又成盒食，冬天我會容許自己肥少少，只要條curve（脂肪比例線）唔好一路上就得」。