文詠珊（JM）早前隨新片《紅VAN》到德國出席柏林影展，其間被外國電影雜誌點名稱讚她的演出，亦有外國網站大讚JM行紅地毯時的服裝，對於首次到當地影展便獲得關注，JM坦言受寵若驚：「我真係估唔到柏林嘅觀眾咁熱情，首映後有啲外國人埋嚟搵我影相或者傾兩句，好意外！」
「一定要爭氣」
談到《紅VAN》的小說原著，JM表示起初只聞其名，但後來越來越多身邊人談及該小說，她才真正的去看：「結果一路睇一路追，到後來冇耐就收到劇本喇，都可以話同《紅VAN》幾有緣。」JM大爆陳果為留《紅VAN》下集伏線，有很多已拍攝的鏡頭亦沒放在電影內，她說：「因為我個角色Yuki好有問題，拍咗啲係咁自摑（嘅鏡頭）都未有放入去住，我好期待睇吓摑成點。」
電影中主場景是紅Van及茶餐廳，JM表示這些狹窄細小的環境更有利於大家培養默契：「拍時氣氛好輕鬆，而且群戲居多，未開機時大家多數都係坐番原位有講有笑。」戲中Yuki戀愛大過天，生命備受威脅仍心繫男友，JM謂這正是自己與Yuki最不同之處：「我係家人同工作行先，感情排第三，感情事多數順其自然，工作就可能會進取啲。」
陳果於戲中有不少政治性隱喻，例如眾人逃離大埔暗喻新一輩的移民潮等，問到身為香港年輕一代的JM怎看這風氣？她充滿正能量說：「無論點我哋一定要爭氣先，希望大家學會更加欣賞自己。」JM由𡃁模蛻變到現在走國際影展紅地毯，她坦言花了不少時間讓人接受她是一名演員：「開頭都怕俾人覺得係玩玩吓，惟有每場戲都盡力做到最好！」