李嘉誠接受胡舒立訪問，回應民粹主義，佢認為政府要避免情緒政策化，一出手就篤正梁政府死穴。梁振英用政客思維去定政策，眾人皆見，邊度有水抽就走去邊，根本冇一套核心施政綱領，競選時就投其所好，討好學術界、傳媒、社運界，明明係建制派中左傾路線，就偏偏包裝成進步改革力量，香港知識分子幼稚病，當時紛紛中招。佢成功第一步，係把握到社會情緒變成競選工具。
但要將情緒「政策化」，談何容易，因為政綱可以天花龍鳳吹水唔抹嘴，但當落實成政策，就要經過官僚理性，包括財務評估、政策影響、執行細節等，而要go through整個官僚程序，係要靠個人政治能力，而非用政治鬥爭，用梁粉在外圍攻擊政務官及其代表理念。
梁振英根本唔重視執行力，但又要掩飾無能，唯一方法是諉過於人及走捷徑，因此先有不斷推出經常性派錢政策，因派錢冇乜政策理性可言。
情緒政策化典型例子係「港人港X」，政策理性欠奉，但又想回應社會情緒抽抽水，於是就用立法方式帶頭歧視內地人，政務官集體沉默，心裏邊就「媽」唔停口。好嘞，結果到中央不滿，就慌忙轉軚，絕口不提港人港地政策。更連帶影響到對自由行overload，提都唔敢提，怕又惹起中央不滿。民粹政客左搖右擺作風，盡顯無遺。
至於李嘉誠期望政府有合適之創新科技政策，培育人才，對民粹政客而言，非不能也，不為也。
因為呢個係長遠投資，非三五年內見效，民粹政客最喜愛搞「項目」、搞硬件，因上馬易，快有嘢睇，老董年代大量硬件落成，現時有冇善用？九龍塘超靚地又一城附近個InnoCenter，仲有幾多incubation項目？有幾多已變成established公司「廉租寫字樓」？分拆科技局，睇怕又會回到老董舊路，大搞創科「項目」，十年如一日。
早講過香港根本冇政府導向產業政策所需之政經條件，以前冇，現時更加冇，以梁振英與主流商界關係，有乜可能官商合謀推動產業發展，有錢佬科技投資當然會選擇美國、以色列，點會選擇香港？所謂產業政策，何嘗唔係一種情緒政策化，扮勁扮做嘢，好似好有規劃、好有願景，扮領袖、扮有型，其實本質係cosplay。
梁粉無視公眾利益
唔信？大家不妨睇睇當日機管局內新貴梁粉羅康瑞火併前朝人主席張建東，不惜公開頴爛塊面，背後原因不過係為咗想搞個航天城商場，而不惜令第三條跑道受拖延，但第三條跑道涉及香港空運樞紐競爭力，航天城商場又點能夠比，鬍鬚仔在預算案力挺第三條跑道重要性，同梁粉對着幹，以公眾利益為先。
一個民粹政客加上一棚以個人短期利益為目標嘅商界支持者，會搞出乜嘢水平嘅產業、創新、科技政策？大家不妨買定花生，可恨者當中所動用之公帑，係你同我都有份比！
添馬男